1. Молия / Банклар ва бошқа кредит муассасалари. Кредитлар

23224 Хўжалик юритувчи субъектлар ўртасидаги ўзаро бир марталик ҳисоб-китоблар учун бюджет маблағлари
Ҳисобварақнинг таърифи: хўжалик юритувчи субъектлар ўртасида ўзаро бир марталик ҳисиб-китобларни амалга ошириш учун Давлат бюджетидан ажратилган мақсадли маблағлар ҳисоби олиб борилади.
Ҳисобварақнинг кредитида Давлат бюджетидан ажратилган маблағлар ҳамда ўзаро ҳисоб-китобларда иштирок этувчилардан келиб тушувчи маблағлар акс эттирилади.
Ҳисобварақнинг дебетида ўзаро ҳисоб-китобларда иштирок этувчилар ҳисобварағига ўтказилган маблағлар ва/ёки Молия вазирлигининг кўрсатмаси бўйича мос ҳисобвараққа ёпиладиган ўзаро ҳисоб-китобнинг фойдаланилмаган суммаси акс эттирилади.
Таҳлилий ҳисоб ҳар бир иштирокчи бўйича уникал код(хос рақам)ларини кўрсатган ҳолда алоҳида шахсий ҳисобварақларда олиб борилади.
Изоҳ: Бошқа ҳисобварақларнинг 23224-ҳисобварақ билан корреспонденцияланиши қатъиян ман қилинади.
23226 Республика бюджетининг экспортчи-корхоналар билан бўладиган мақсадли ҳисоб-китоблар учун маблағлари
Ҳисобварақнинг таърифи: Республика бюджетидан экспорт қилинган товарларнинг таннархи билан уларнинг марказлаштирилмаган экспорт бўйича сотилган нархи ўртасидаги фарқни қоплаш бўйича мақсадли молиялаштириш қатнашчиларига ажратилган маблағлар ҳисоби олиб борилади.
Ҳисобварақнинг кредитида мақсадли молиялаштириш қатнашчиларига келиб тушган бюджет маблағлари акс эттирилади.
Ҳисобварақнинг дебетида мақсадли молиялаштириш иштирокчиларининг ҳисобварақларига ўтказилган маблағлар, шунингдек ҳисобварақ бўйича қолдиқнинг Молия Вазирлигининг мос ҳисобварағига ёпилиши акс эттирилади.
Таҳлилий ҳисоб ҳар бир иштирокчи бўйича алоҳида шахсий ҳисобварақларда олиб борилади.
23228 Республика бюджетининг пудратчи ташкилотлар билан бўладиган мақсадли ҳисоб-китоблар учун маблағлари
Ҳисобварақнинг таърифи: Ўзуйжойжамғармабанк филиаллари билан тузилган шартномага асосан уй-жой биноларини қураётган пудратчи ташкилотларининг қўшилган қиймат солиқ(ҚҚС)лари бўйича юзага келган салбий фарқни қоплаш учун қилинган харажатларга доир мақсадли тўловлари ҳисоби олиб борилади.
Ҳисобварақнинг кредитида ҚҚС бўйича пудратчи ташкилотларга бюджетдан келиб тушган маблағлар суммаси акс эттирилади.
Ҳисобварақнинг дебетида солиқлар тури бўйича бюджетга бўлган тўловлар суммаси акс эттирилади.
Таҳлилий ҳисоб пудратчи ташкилотлар ва бюджет муассасалари бўйича даромаднинг шартли рақамини кўрсатган ҳолда алоҳида шахсий ҳисобварақларда олиб борилади.