1-мавзу ҳУҚУҚшунос мутахассис шаклланишида замонавий иш кўникмалари ва компетенцияларнинг роли

Жамоада ишлаш кўникмаси
Ўзингиз учун “жамоада ишлаш” сизнинг кучли томонларингиздан бири эканлигини аниқлаб олинг. Қуйида ушбу кўникмани баҳолашнинг асосий мезонлари келтирилган:

• 
  Курсдошлар доим сиздан ёрдам сўрашади.
  
• 
  Улар сизнинг лойиҳа гуруҳларида иштирок этишингизни хоҳлашади.
  
• 
  Сизни тез-тез тушликка таклиф қилишади.
  
• 
  Мураккаб вазиятда фикрингизни билиш учун сиздан кўмак излашади.
  
• 
  Сиз кўпинча курсдошлар ўртасидаги келишмовчикларни ҳал қилишда кучли воситачи вазифасини бажарасиз.
  

Ишга кираётганингизда берилиши мумкин бўлган қуйидаги саволларга жавоб бериш орқали эса сиз жамоада ишлай олиш кўникмангизни билиб олишингиз мумкин.

• 
  Сизнинг кучли томонларингиз?
  
• 
  Асосий ютуқларингиз?
  
• 
  Нима учун айнан сизни ишга қабул қилишимиз керак?
  
• 
  Жамоа таркибида фаолият юритган пайтингиздаги муваффақиятли лойиҳа ҳақида айтиб беринг.
  
• 
  Қийин мижозлар билан иш олиб борган ҳолатингиз ҳақида сўзлаб беринг.
  
• 
  Жамоада ишлаш туфайли натижага эришганингиз тўғрисида мисоллар келтиринг.
  
• 
  Қайси жиҳатлар сизни яхши ходим/менежер дейиш учун асос бўла олади?
  
• 
  Жамоа учун серунум муҳитни қандай яратган бўлардингиз?
  
• 
  Сизнингча, муваффақиятингиз сабаби нимада?
  
• 
  Қачон бўлмасин ходим билан низога борганмисиз?
  

2. Коммуникатив кўникмалар.

Кучли коммуникатив – алоқага киришиш кўникмалари ходимларни маҳсулдор ва янада самарали қилади. Агарда сиз биринчи учрашувнинг ўзидаёқ тўғри мулоқот қилишни ва алоқа ўрнатишни билсангиз, аксарият иш вақтингиз тежалади, акс ҳолда бу вақт аниқлаштиришга, саволларга жавоб топишга, суҳбатдош ёхуд шерикни тушунмасликка, хатоларни тузатиш ва ҳоказоларга сарф қилинади.

Коммуникатив кўникмалар, шунингдек, янги иш жойига эга бўлишда ҳам ҳал қилувчи роль ўйнайди. Пировард натижада, резюменгизга қараб ҳамда суҳбат (оғзаки мулоқот кўникмаси) давомида сизнинг қай даражада мулоқот қила олишингиз дарҳол кўзга ташланади. Ҳам резюмеда, ҳам сиз билан бўладиган биринчи суҳбатда ўзингизнинг мулоқот қила олиш кўникмаларингизни албатта кўрсатишингиз зарур, нега деганда, улар саралаш индикатори ва интервьюнинг иккинчи босқичига ўтишнинг йўлланмаси ҳисобланади.
Профессор Тициан Касьяро ва унинг ҳамкасблари томонидан катта юридик фирманинг 154 нафар ҳуқуқшуноси иштирокида олиб борилган тадқиқотга кўра, аксарият юристларда касбий мулоқотга нисбатан иккиланиш ёки ундан безиллаш ҳисси кузатилган.


Тициана Касьяро уларнинг мулоқотга бўлган муносабатини ўзгартириш ва антипатияни бартараф қилишда самара бериши мумкин бўлган 4 стратегияни ишлаб чиққан:

• 
  Эътиборни кўпроқ ўқишга қаратиш
  
• 
  Муштарак қизиқишларни белгилаб олиш
  
• 
  Нима таклиф бера олишингиз ҳақида кенгроқ ўйлаш
  
• 
  Жамоа учун янада юқорироқ мақсадни топиш
  

Джулин Миривелнинг “Ижобий коммуникация санъати” (Theartofpositivecommunication) номли китобида инсоннинг коммуникация кўникмаларини ривожлантирувчи бир нечта тамойиллар таклиф қилинади. Булар: саломлашиш, сўраш, кўнгил олиш, ўзини намоён қилиш, рағбатлантириш, қулоқ тутишни билиш, илҳомланиш.


Ўйлаб кўришга арзийди: Ҳаётда шундай вазиятлар бўладики, ақли, қобилияти бир хил икки кишининг ишда эришадиган муваффақиятлари ҳар хил бўлиши мумкин.
Агар оғзаки ёки ёзма мулоқот сизнинг заиф томонингиз бўлса, бундан дарров тушкунликка тушманг: коммуникатив кўникмаларни ривожлантириш мумкин ва ҳар қандай хоҳловчи уларни эгаллай олади. Даставвал коммуникациянинг бош вазифаларини эслаб қолинг:
• Алоқа ўрнатиш
• Ўзини намоён қилиш
• Ўзгани қулоқ солиб тинглаш ва уни тушунганингизни тасдиқлаш
• Ўз қарашига ишонтириш
• Акс алоқага эга бўлиш