1-mavzu. O’zbek davlatchiligining shakllanishi va dastlabki taraqqiyot bosqichlari. O’zbek xalqining etnik shakllanishi. Ajdodlarimizning ja’on tsivilizatsiyasiga qo’shgan xissasi

1.2-mavzu. O‘zbek davlatchiligining shakllanishi va dastlabki taraqqiyot bosqichlari
(2 soat)
2.1. Markaziy Osiyo hududidagi dastlabki davlat uyushmalari.
2.2. Qadimgi ajdodlarimizning eron ahamoniylari va yunon-makedon bosqinchilariga qarshi kurashi.
2.3. O‘zbek davlatchiligi rivojidagi antik davr. Yunon-Baqtriya, Qang‘, Parkana va Tohariston davlatlari.
2.4. Kushon podsholigi Markaziy Osiyo davlatchiligi taraqqiyotidagi yangi bosqich ekanligi.


Qo‘llaniladigan pedagogik texnologiyalar: insert texnikasi, jamoada ishlash, baliq skeleti, keys stadi.


Tayanch so‘z va iboralar: Davlatchilik. Shakllanishi va rivojlanishi. Qadimiy davlatchiligimizning tarixiy ildizlari. Ilk davlat uyushmalari. Eron ahamoniylari va ularga qarshi ozodlik kurashlari. To‘maris. Shiroq. Yunon makedonlar. Spitamen. Salavkiylar. Yunon Baqtriya, Parfiya, Davan, Qanxa, Kushon davlatlari. Buyuk ipak yo‘li.


1.Markaziy Osiyo hududidagi dastlabki davlat uyushmalari.
Qadimiy yozma manbalarda yurtimiz hududida quyidagi davlatlar bo‘lganligi tilga olinadi. Bular: Baqtriya-hozirgi Surxondaryo, Tojikistonning Amudaryoga yaqin yerlari va shimoliy Afg‘oniston hududlari. Katta Xorazm-Amudaryoning quyi oqimidagi shimoliy yerlar, Murg‘ob vohasi va Parfiya hududlari. Biroz keyinroq esa Sug‘diyona – Zarafshon vohasi va Qashqa vohasi hududlaridir.
Qadimiy yozma manbalarda Amudaryo-Oks, Sirdaryo-Yaksart, Zarafshon-Politimit deb atalgan. Qadimda yashagan ajdodlarimizni yunonlar skiflar deb ataganlar. Bu ajdodlarimiz to‘g‘risida yunon muarrixlari juda qimmatli ma’lumotlar yozib qoldirganlar. Jumladan, Pompey Trog ularni eng qadimiy xalqlar qatoriga qo‘shib, “qadimiylikda ular misrliklar bilan bahslashadilar”, deb yozgan. Bu xalqqa berilgan nom ularning turmushini sifatlovchi ma’noni anglatgan. Bu qadimgi ajdodlarimiz g‘arbda Dnepr daryosidan tortib sharqda Tyanshan tog‘larigacha cho‘zilgan dasht va sahrolarda yashaganlar.