1-mavzu. “Moliyaviy muassasalar”

Keysda bayon qilingan vaziyat

Omaviy axborot vositalarida: “Davlat o’z vazifalarini bajarish jarayonida bir qator xarajatlar qilishi zarur. Bular, eng avvalo, mamlakat iqtisodiyotini rivojlantirish uchun turli tarmoqlarga investitsiya qilishga mo’ljallangan, aholining turmush darajasini ko’tarishga qaratilgan, ijtimoiy vazifalarni bajarishga ajratilgan, ijtimoiy himoyani tashkil etish, jumladan, keksa yoshdagilar va ishlamaydigan fuqarolar uchun nafaqalar, dafn marosimlari uchun nafaqalar, pensiyalar, umumfoydalanuvdagi avtomobil yo’llarini loyihalashtirish xarajatlari, umumfoydalanuvdagi avtomobil yo’llarini qurish va rekonstruksiya qilish xarajatlari, umumfoydalanuvdagi avtomobil yo’llarida sodir bo’lgan tabiiy ofat oqibatlarini oldini olish va bartaraf etish xarajatlari, davlatni boshqarish, mudofaani ta’minlash, kabi aniq maqsadlar uchun rejalashtirilgan xarajatlardan iborat bo’ladi. Bu umumdavlat xarajatlari byudjet orqali moliyalashtiriladi”, degan ma’lumotlar keltirildi. Shu ma’lumotlarga tayangan holda, o’qituvchining “Moliya” fanidan “Davlatning kafolatlarini moliyaviy ta’minlash manbalari nimalardan iborat?” deb berilgan savolga, talaba: “Turli ijtimoiy va iqtisodiy yo’nalishdagi davlatning barcha xarajatlari davlat byudjetidan moliyalashtiriladi”, degan mazmunda javob berdi. Talabaning ushbu javobi talabalar o’rtasida bahs munozaraga olib keldi.