1-mavzu: farmatsevtika tizimini boshqarishda menejment asoslari

Menejment:

1) Jarayon sifatida rahbar va boshqaruv apparatini insonlarning birgalikdagi faoliyatini belgilangan maqsadga erishish yo‘lida muvofiqlashtirishga qaratilgan kasbiy faoliyatdir;

2) Fan sifatida boshqaruv faoliyatining qonunlari va qonuniyatlari, tamoyillari, funksiyalari, shakllari va usullarining nazariy asoslarini tashkil etadi. Menejment fani ilmiy asoslangan holda, iqtisodiy, ijtimoiy, huquqiy va boshqa qonunlarga tayanadi.

3) Tashkilot boshqaruv apparatining tashkiliy tuzilmasini aks ettiradi;

4) Faoliyat turi sifatida rahbarlik lavozimini anglatadi.

Menejmentning asosiy elementi tashkilotning aniq maqsadi bo‘lib, u ko‘p jihatdan tashkilot faoliyatining muvaffaqiyatini belgilab beradi. Shu sababli har bir menejer o‘zi boshqarayotgan bo‘g‘inning maqsadini to‘g‘ri va aniq ifodalay olishi, hamda unga erishish vositalarini belgilashi lozim.
Boshqaruv maqsadi quyidagi talablarga javob berishi kerak:
-aniqlik (aniq ifodalangan yakuniy natija);
-mantiqiyligi (mazmuni bo‘yicha bir ma’noni anglatishi, qarama-qarshi talqinlarning istisno etilishi);
- erishish imkoniyati (bajarilishi mumkin bo‘lishi kerak);
- miqdoriy jihatdan o‘lchanishi;
- vaqt bo‘yicha belgilanganligi (bajarish muddatlari)
- maqsad barcha bajaruvchilarga tushunarli bo‘lmog‘i darkor;
- maqsadni amalga oshirish bo‘yicha xatti-harakatlar bo‘limlar va mas’ullar bo‘yicha taqsimlangan bo‘lishi lozim;
- samaradorlik (natija va foyda berishi).
Tashkilotning boshqaruv maqsadlarini turli mezonlar bo‘yicha tasniflash mumkin, ularning ichida vaqt davri, takrorlanish va ustuvorlik mezonlari yetakchilik qiladi.
Vaqt davriga qarab maqsadlar strategik (5—10 yillik davri uchun), taktik (5 yilgacha), tezkor (operativ) maqsadlarga ajratiladi.
Ustuvorlik darajasi bo‘yicha maqsadlar zudlik bilan amalga oshiriladigan va nomuhim maqsadlarga toifalanadi.
Takrorlanishi bo‘yicha esa — doimiy, davriy takrorlanadigan va fursatli maqsdlarga bo‘linadi. Doimiy va davriy takrorlanadigan maqsadlar uchun, odatda, standart axborotlardan foydalangan holda, ya’ni rasmiy yondashuv ishlab chiqiladi. Fursatli maqsadlarga erishish uchun yangi uslublar yaratiladi, mutaxassislar o‘qitiladi, yangi resurslar izlab topiladi.