1-mavzu. Avtotransport korxonalari fanining mazmuni, maqsadi va vazifalari

Fanning maqsadi talabalarga amaliy iqtisodiy bilimlarni, shuningdek, mustaqil fikrlash hamda olingan axborotlar va mustaqil o‘rganish yordamida avtotransport korxonalari iqtisodiyoti muammolari bo‘yicha qaror qabul qilish ko‘nikmalarini singdirishdadir. Shuningdek, mutaxassislarni ishlab chiqarishni tashkil qilish, rejalashtirish va boshqarish vazifalarini malakali tarzda hal qilish, korxonaning xarajat va daromadlari qanday yuzaga kelishi hamda ishlab chiqarish samaradorligini oshirish imkoniyati mavjud bo‘lgan yo‘llarni topish shular jumlasiga kiradi.
Biroq shuni ham unutmaslik kerakki, istalgan bilimlar doimo to‘ldirib va mukammallashtirib borilmas ekan, eskirib qolishi hamda korxonalar hayotida vujudga keluvchi turli xil vazifalarni hal qilishga yaramay qolishi mumkin. Gap shundaki, fan-texnika va iqtisodiyotning rivojlanishi qo‘shimcha bilimlar chegarasini kengaytiradi hamda korxona xodimlarining hozirgi kun talablariga javob beruvchi bilim, ko‘nikma va malakaga ega bo‘lishlarini talab qiladi. Shu sababli olingan axborotlar, o‘rganilgan ifoda, atama va kategoriyalar bilan cheklanib qolmasdan, ularni doimiy ravishda to‘ldirib, fan va xo‘jalik amaliyotining so‘nggi yutuqlari asosida rivojlantirib borish lozim.
«ATK iqtisodiyoti» fan sifatida boshqa iqtisodiy fanlar bilan, jumladan, «Iqtisodiy nazariya», «Mikro va makroiqtisodiyot», «ATK menejmenti”, «ATK xo‘jalik faoliyati tahlili”, “Statistika” kabi fanlar bilan bog‘liq bo‘lib, unda korxonalarning tashkiliy tuzilmasidan tashqari joriy va istiqboldagi ishlab chiqarishni rejalashtirish, mehnatni tashkil qilish va haq to‘lashning asoslari ishlab chiqiladi.