1. F. Sh. Toshmuhamedova, H. U. Aliyev, R. Z. Nizomov,, Umumiy farmakologiya va retseptura’’

Хлорпротиксен (труксал) – тиоксантен унуми. Анксиолитик фаоллиги бўйича фенотиазинлардан кучсиз. Бошқа препаратлардан антидепрессантлик хоссасининг мавжудлиги билан фарқ қилади. Кучли седатив ва қусишга қарши хоссаларга эга, наркоз учун ишлатиладиган, наркотик турдаги ухлатувчи ҳамда оғриқ қолдирувчи воситаларнинг таъсирини кучайтиради. Камроқ миқдорда α-адренорецепторларни блоклайди. Ножўя таъсирлари аминазинникига ўхшаш, аммо камдан-кам ҳолларда фотосенсибилизация ва терининг пигментациясини чақиради.
Галоперидол (галофен) – бутирофенон унуми бўлиб, таъсири нисбатан тез юзага чиқади ва узоқ давом этади. Ичилганда қон зардобидаги максимал концентрацияси 2-6 соатдан кейин пайдо бўлиб, юқори даражада 3 суткагача сақланиб қолади, 5 кундан кейин эса киритилган препаратнинг 40%и буйраклар орқали ажратилади.
Галоперидолнинг кучли антипсихотик самараси кучсиз седатив хосса билан бирга намоён бўлади. Унинг таъсир механизмини дофамин рецепторларининг блокадаси ва марказий α-адреноблокаторлик таъсири, шунингдек, норадреналиннинг нейронал ушланилишининг ва деполанишининг бузилиши билан боғлаш мумкин. У юқори дозаларда дофаминнинг қусиш марказининг улаб юборувчи зонасидаги Д₂-рецепторларини блоклайди. У наркоз учун ишлатиладиган, наркотик турдаги ухлатувчи ҳамда оғриқ қолдирувчи воситаларнинг таъсирини кучайтиради. Фенотиазин унумларидан фарқли равишда галоперидол “тез” уйқу босқичини қисқартирмайди. Терапевтик дозаларда ганглиоблокловчи ва атропинсимон хоссаларга эга эмас, периферик α-адренорецепторларни камроқ миқдорда сусайтиради. АҚБни одатда пасайтирмайди, ортостатик гипотензия чақирмайди. Ножўя таъсирлардан кўпинча экстрапирамидал бузилишлар келтириб чиқаради. Бундан ташқари, тери реакциялари, баъзан лейкопения пайдо бўлиши мумкин. Дозаси ошиб кетганда ваҳима, қўрқув, уйқусизлик юзага чиқади.
Дроперидол – бутирофенон унуми. Галоперидолдан фарқли равишда таъсири қисқа давом этади. Асосан нейролептанальгезияда наркотик анальгетик фентанил билан бирга ишлатилади (Таламонал – 1 мл ида 2,5 мг дроперидол+0,05 мг фентанил сақлайди).
Сульпирид – бензамид алмашинган ҳосилаларга киради, дофаминнинг Д₂-рецепторларини танлаб блоклайди. Кучли ифодаланган антипсихотик самарага эга. Қусишга қарши фаоллиги ҳам мавжуд бўлиб, седатив самараси жуда суст. Уни ишлатилганда кучсиз гипотония келиб чиқади. Экстрапира-мидал бузилишлар камроқ кузатилади. МИЙдан ёмон сўрилади, t_1/2=5-10 соат.