1-basqısh (20 minut) Ózbekstan respublikasíndaǵÍ ekonomikalíQ

INVESTICIYA JOYBARLARÍNÍŃ NÁTIYJELILIGI KÓRIP SHÍǴÍLDÍ

Prezident Shavkat Mirziyoyev 4-noyabr kúni investiciya joybarlarınıń nátiyjeliligin arttırıw máseleleri boyınsha jıynalıs ótkerdi.

Mámleketimiz tárepinen aqılǵa muwapıq ekonomikalıq diplomatiya alıp barılıp atırǵanı nátiyjesinde eksport hám investiciya muǵdarı izbe-iz artıp barmaqta. Atap aytqanda, sońǵı bes jılda shet el investiciyalar kólemi 3 esege ósken. Bunıń nátiyjesinde júzlegen zavod hám kárxanalar iske túsirilip, ónim hám xızmetler kóbeydi, adamlar jumıslı boldı, jańa imaratlar qurıldı.

Bunday isler hár bir tarmaq hám aymaqta dawam etpekte. Jıl basınan berli 179 iri hám 10 mıń aymaqlıq joybarlar iske túsirilgen. Olarǵa 76 trillion sum investiciya jóneltirilgen. 143 mıń jumıs ornı jaratılǵan.

Jıynalısta jańa joybarlardı óz waqtında orınlaw hám aldın iske túskenlerin tolıq quwatqa shıǵarıw ilajları dodalandı.

Sońǵı jıllarda paydalanıwǵa tapsırılǵan 442 joybar tómen quwatta islep atirǵanı atap ótildi. Orınlarda úyrenilgende, olardıń 238 inde shiyki zat hám bazar tabıw, 115 inde kredit, 35 inde infrastruktura menen baylanıslı mashqalalar bar ekenligi anıqlanǵan.

Wálayat hákimlerine bul kárxanalar mashqalaların sheshiw boyınsha kórsetpeler berildi. Investiciyalar hám sırtqı sawda ministrligine jıl juwmaǵına shekem 139 iri hám 3 mıń aymaqlıq joybarlardı iske túsiriw wazıypası qoyıldı.

Mámleketimiz basshısı hár bir sum investiciya ekonomikaǵa nátiyje bolıp qaytıwı, xalqımız mápine xızmet etiwi kerekligin aytıp ótti. Sol sebepli joybarlar boyınsha kreditlerdiń maqsetli isletiliwi hám keleshekte nátiyje beriwi qatań qadaǵalawǵa alındı.

Sanaat joybarlarında tiykarǵı itibar zamanagóy, básekige shıdamlı, ótimli ónimler islep shıǵarıwǵa qaratılǵan. Sol sebepli olar ushın aldıńǵı shet el texnologiyaları satıp alınǵan.

Jıynalısta bıyılǵı jılda import etilgen 270 ten artıq úskene ele ornatılmaǵanı kórsetip ótildi. Buǵan sebep bolıp atırǵan proceslerdi ápiwayılastırıp, úskenelerdi tezirek paydalanıwǵa kirgiziw zárúrligi atap ótildi.

Shavkat Mirziyoyev Prezident saylawı aldınan xalıq penen ushırasıwlarda investiciya joybarların ámelge asırıw boyınsha jańa sistema engiziliwin aytqan edi. Onıń ushın hárbir aymaqta “rayon joybar toparları” hám xolding kompaniyaları dúziliwi jobalastırılǵan. Bul jańa strukturalar isbilermenlerdiń biznes sherigine aylanadı. Olar isbilermenlerdiń janında turıp, ideyadan baslap, investorlardı tartıw hám joybarlardı tolıq quwatta islewine shekem hár kúni járdem beriwge juwapker boladı.

Jıynalısta bul jańa sistemanı tez hám nátiyjeli shólkemlestiriwge tiyisli wazıypalar belgilendi.

Prezident shet el investiciya hám eksport kólemin arttırıwda mámleketimizdiń shet mámleketlerdegi elshileri iskerligi zárúrligin atap ótti. Aymaq hám tarmaq basshılarına perspektivalı joybarlar tawıp, elshiler menen birgelikte olardı ámelge asırıw boyınsha tapsırmalar berildi.