1 – ma’ruza mavzusi. Mikrobiologiya fani, o’rganish obektlari, vazifasi hamda bo’limlarga tavsif. (2s.)

Mikrobiologiyaning bir qancha tarmoqlari mavjud:

• 
  Umumiy mikrobiologiya;
  
• 
  Tibbiyot mikrobiologiyasi;
  
• 
  Qishloq xo’jalik mikrobiologiyasi ;
  
• 
  Veterinariya mikrobiologiyasi;
  
• 
  Sanoat mikrobiologiyasi ;
  
• 
  Suv mikrobiologiyasi;
  
• 
  Kosmik mikrobiologiya va boshqalar.
  

Umumiy mikrobiologiya mikroorganizmlar hayot faoliyatining umumiy qonuniyatlarini o’rganadi. Ular bu fanning asosini tashkil qiladi. Umumiy mikrobiologiya mikroorganizmlarni tekshirish usullari hakida, hamda mikroorganizmlarning morfologiyasi, fiziologiyasi, bioximiyasi, sistematikasi, o’sishi va ko’payishi haqida axborot beradi; u azot, uglerod, oltingugurt, temir moddalarining tabiatda aylanishini, ularda ishtirok etuvchi mikroorganizmlarning rolini o’rganadi.
Meditsina mikrobiologiyasi odamlarda kasallik qo’zg’atuvchi patogen mikroorganizmlarning morfologiya va fiziologiyasini, har xil kimyoviy moddalar, ayniqsa, dezinfektsiya qiluvchi moddalarga chidamliligini, mikroorganizm va mikroorganizmlar orasidagi munosabatlarni o’rganadi. Bularni hammasi umumiy tibbiyot mikrobiologiyasida o’rganiladi.
Maxsus tibbiyot mikrobiologiyasida esa muayyan yuqumli kasalliklarni qo’zg’atuvchilari, ularni mikrobiologik diagnostika usullari, o’ziga xos profilaktikalari va davolash usullari o’rganiladi. Tashqi muhit ob’ektlarida patogen mikroorganizmlarni aniqlash ham katta ahamiyatga egadir. O’rganiladigan ob’ektlarning mikroorganizmlariga qarab mikrobiologiya mustaqil fanlarga - virusologiya va sanitariya mikrobiologiyalariga ajralib, odamlarni yashash sharoitlariga qarab ularni mikroflorasi va mikrobiologik jarayonlarini gigiena va sog’lomlashtirish nuqtai nazardan o’rganadi.
Sanoat mikrobiologiyasi mikroorganizmlarning biokimeviy faolligini o’rganib, ular vositasida spirt, organik kislotalar, antibiotiklar, vitaminlar va ba’zi gormonlar olish vazifalarini bajaradi.